GKPS Resort Bandung mar Pesta Olob-olob, Tarsunggul bani “Haluahonni” Simalungun

Sekjen GKPS Pdt Dr. Paul Ulrich Munthe dan Inang Foto Bersama pakon parhobas bani Pesta Olob-olob GKPS Bandung 2021, Minggu 5 September 2021 .(Foto: Desmanjon Purba, S.S.)

Bandung, BS- Pengurus Seksi Bapa Resort GKPS Bandung itodoh (dipilih) Pengurus GKPS Resort Bandung manusun ranggian anjaha manghorjahon Pesta Olob-olob GKPS Bandung 2021. Bani persiapan na relatif tongkin (3 minggu) do hansa, panitia Pesta Olob-olob GKPS Bandung 2021 iparmaloi do mangadonghon 2 (dua) acara banggal aima pra olob-olob bani tanggal 4 September 2021 na isiarhon langsung via Youtube hun studio musik i Kota Bandung pakon Ibadah Olob-olob hun GKPS Bandung na itayanghon via zoom pakon Youtube, 5 September 2021.

Bani kondisi pandemi Covid sonari on, parhobas atappe peserta bani acara pra olob-olob, wajib do lobei mandalani test swab janah hasilni negatif Covid-19 do haganup, anjaha jumlah na roh pe bani ianan pelaksanaanni acara ai (studio musik) ibatasi do homa. Sonai homa bani acara Ibadah Olob-olob i GKPS Bandung, idalanhon do protokol kesehatan na “ketat”. Ai do mambahen taridah hirpas do ganup parhobas na dihut bani horja on.

“Na gabe sidapothononni hita panitia pesta on, aima, ase boi tongon hita warga GKPS Resort Bandung on marpesta olob-olob age pe bani pandemi Covid-19 sondahan on. Anjaha dingat hita tongtong historini pardasni ambilan na madear hu tanoh Simalungun. Marolob-olob GKPS Resort Bandung, halani tarsunggul bani Haluahonni Simalungun," nini Ketua Panitia salihat Ketua Pengurus Seksi Bapa GKPS Resort Bandung Bp. Ryant Starcest Saragih idampingi Sekretaris Panitia salihat Sekretaris Pengurus Bapa GKPS Resort Bandung, Bp St. Frans Sipayung, i Bandung, 5 September 2021.

Mesek Ganup “Mandihuti” pra Olob-olob

Bani pra olob-olob, 4/9/2021, iadonghon do live music & performance para petalenta kuria GKPS Resort Bandung. Sanggah acara ai, ibahen do homa patumpuhon “batuni demban/dana” dalam rangka mewujudkan kepedulian janah mambere pangurupion hubani warga GKPS Resort Bandung na mabalu, lanjut usia, pakon hubani keluarga na terpuruk ekonomi ni halani terdampak Covid-19.

Kepedulian gareja pe iwujudhon do marhitei mambere apresiasi (penghargaan) hubani haganup tenaga kesehatan na adong i GKPS Resort Bandung halani domma marloja-loja sidea gabe garda terdepan melayani pasien Covid-19 secara langsung/tidak langsung i rumah sakit.

Suasana bani ibadah olob-olob GKPS Resort Bandung, Minggu 5 September 2021 marianan i GKPS Bandung.

Judul acara praolob-olob on aima “Tarsunggul Tanoh Hatubuhan”. Songon judulni ai, lagu-lagu haporsayaon/rohani pakon pop Simalungun do na itampilhon bani acara ai. Na istimewa, dong do homa performance (penampilan) bapa Sekretaris Jenderal GKPS, Pdt. Dr. Paul Ulrich Munthe na roh hun Pematangsiantar mangolobhon acara ai, mandodinghon doding haporsayaonni halak Kristen “bai pardalananni goluhku”.

Performance grup musik luar biasa itampilhon namaposoni GKPS Resort Bandung na ipimpin Marvel Sumbayak, namaposo “berbakat” hun GKPS Bandung Timur. Vocalis Liora Purba hun GKPS Bandung Timur mandodinghon logu Puji ma Naibata & Haleluya Puji ma Tuhan, ciptaan St. AK Saragih & Pdt. RJ Saragih, S.Th.

Tampil do homa duet Desi Girsang & Ribka Sipayung hun GKPS Bandung Selatan mandodinghon “roh do au Tuhan, ciptaan John Eliaman Saragih. Duet Agnesya Damanik dan Efri Damanik hun GKPS Bandung mandodinghon logu Boras Tenger, ciptaan Pdt. Ito Belihar Purba. Dong do homa performance humbani Trio Namposo GKPS Bandung Timur (Felix Purba, Josua Purba, Rhandy Sumbayak) mandodinghon lagu Lambin Gargar, ciptaan Bless4One.

Hadiah hubani Juara Terbaik Lomba Vlog Dayok Nabinatur.

Logu Galangan, ciptaan Pdt Ito Belihar Purba, jenges tumang idodinghon Nidya Damanik, namaposo hun GKPS Bandung Timur. Gabungan petalenta pra olob-olob “all stars” mandodinghon lagu Sanggah Manabad Matani Ari, ciptaan St AK. Saragih.

Lang lupa, performance duet Inang St Mariaty Sumbayak & St. Krisman Saragih sekaligus MC bani acara on, manisei haganup “penonton” hun Simalungun mandodinghon Horas Simalungun. On ma sebagian lirikni, … “laho au misir mardalani, hu Simalungun. Lopus au das hu Bangun Purba, Marubun Lokkung. Hunjai hu Sindar raya, lopus hu Bah Tonang. Manlegot hu hutanta i Simbandar. Hun Siattar au hu Sidempuan, lopus hu Raya. Das hu Tigarunggu, hu Sardolok, Silimakuta. Mulak hu Haranggaol, das hu Tigaras. Hun hu Sidamanik, mulak hu Siattar…”. Idodinghon inang ai do homa lagu Poldung Sirotap Padan, ciptaanni Taralamsyah Saragih. Lurlur tangaron doding ai.

Riahdo Trio Bandung (RTB) tampil sebagai bintang tamu, pasingathon penonton ase ulang lupa bani tanoh Simalungun, idodinghon sidea do Tanoh Simalungun. On ma sebagian lirikni lagu ai, “… Sanggah nahundul au iujung ai, hutatap tanoh hasusurankin ijin. Tanoh simalungun hasiholankin. Tanoh Simalungun hasiholankin. Nasiam hasoman parsiou na daoh, ingatma padan tingki borhat ham hunjin, tanoh Simalungun ulang lupa ham, Tanoh Simalungun ulang lupa ham...”. Idodinghon RTB on do lagu Simalungun na familiar bani suku Toba ai ma lagu na marjudul Elvi ciptaan Damma Silalahi, Sitalasari, pakon na legan.

Acara pra olob-olob on lang mambahen losog panonton ibagas studio pakon i daratni studio via Youtube. Acarani tongon lang lumei (tidak hampa), dong makna “olob-olob” na terjadi ijon. Mesek ganup, lang dong mose.

Ibadah Olob-olob, Tahapan yang Baru

Full timerni GKPS do na melayani bani ibadah Olob-olob GKPS Resort Bandung, 5/9/2021. Maragenda aima Pandita/Ketua Pengurus GKPS Resort Bandung Pdt. Albert A. Purba, S.Th., pambasa doding aima Pdt. A. Nugraha Saragih. PW Karmianna Purba pambobai bani kanon “Olob-olob”.

Bani ambilan na ibobanhon Pdt Dr. Paul Ulrich Munthe na ibuat humbani Jesaya 35, 4-10, ipadas do hubani jemaat GKS Resort Bandung, ase haganup jemaat manghaporluhon hagogohan na ekstra humbani Tuhan. “Kita perlu ekstra kekuatan humbani Tuhan, Berkaryalah ya Tuhan dalam hidupku, sehingga Kabar Baik itu mengubah hidupku, “nini Sekretaris Jenderal Sinode GKPS ai bani ambilanni, i Bandung, 5/9/2021.

Siluah ni panitia na songon apresiasi hubani Nakes kuriani GKPS Resort Bandung.

Nini bapa Sekjen ai, ambilan na madear na ijalo (halak Simalungun), bukan sekedar mengubah suasana hati, tetapi membawa satu tahapan yang baru dalam kehidupan, yaitu, kehidupan yang lebih baik lagi bersama dengan Tuhan. Ipatorang parambilan do homa, bahasa, marhitei pardasni Pandita Agus Theis hu Pematang Raya, tahun 1903, bahat ma terjadi perubahan-perubahan i Simalungun.

Dob honsi 6 (onom) taun pandita ai marhorja, baru pe dong halak Simalungun na ibaptis. Ibagas na onom tahun ai, domma dong terjadi perubahan hubani halak Simalungun, songon perubahan pasal berpikir, perubahan bani bidang kesehatan, dan perubahan bani bidang pendidikan.

“Bani 4 bulan, pandita ai membuka kegiatan pendidikan, mengajar anak-anak i teras rumahni Raja Raya. Ibotoh halak ma berhitung pakon membaca. Mulaima halak mambotoh selain bulung-bulung dong do homa pil atappe tablet, anggo dong na magin-magin, aima ibere gabe tambar, “nini Sekjen GKPS ai.

Bani ambilanni, Pdt. Dr. Paul Ulrich Munthe padashon sungkun-sungkun hubani warga gareja, “sonari, apakah Injil na domma ijalo hita, kita yang sudah percaya kepada kuasa dan karya Allah, apakah sudah ada perubahan dalam diri kita? Apakah kita betul-betul sudah masuk dalam tahapan baru kehidupan ini yang menunjukkan kita sebagai orang percaya, yang punya pengharapan, yang selalu optimis dalam hidup?”.

Pargotongni boru Purba on manghatahon, sebelum Covid melanda dunia ini, Tuhan sudah bekerja. Sudah didengung-dengungkan revolusi industri 4.0 na i mulai hun profesor par Jerman. “Apa isinya? On ma na ipakei hita ai, teknologi informasi (pakon komunikasi).

Sehingga saat pandemi Covid-19 datang, kita tahu apa yang kita dapat lakukan. Bukankah itu sesuatu yang luar biasa, sehingga kita tidak menyalahkan Tuhan dengan mengatakan laho marminggu pe ilarang-larang?”, nini bapa Sekjen ai.

Lomba Vlog Dayok Nabinatur

Halani tarsunggul do bani Simalungun, iadonghon panitia do homa Lomba Vlog Dayok Nabinatur. Bani acara perayaan Pesta Olob-olob GKPS Resert Bandung, (5/9/2021), iumumhon panitia do tolu peserta lomba vlog dayok nabinatur na sidearan. Terbaik I iraih keluarga Maruba Herdyanto Sinaga, terbaik II keluarga Japer Sinaga, pakon terbaik III keluarga Ferdiansen Purba.

Bapa St. Eli Henry Purba pakon Inang Ny St. S.T. Sipayung br Purba sebagai dewan juri perlombaan vlog dayok nabinatur merasa bangga halani buei pe parantou Simalungun na i Bandung on boi patupahon dayok nabinatur.

Lang dalahi attape parbapaon tumang be na boi mambahen, tapi parinangon pe domma boi patupahon dayok nabinatur sonari on. Ipatorang sidea do homa, langkah-langkah patupahon dayok na binatur, aima humbani pemilihan dayok na manggoluh das hubani mambatur gori dayok nabinatur ai bani jarojak.

Ijon taridah ma tongon, GKPS Resort Bandung on lang hape pasoya-soyahon penetapan makanan khas Simalungun, Dayok Nabinatur, sebagai Warisan Budaya Tak Benda (WBTB) oleh Pemeritah Repuplik Indonesia marhitei Keputusan Kementerian Pendidikan dan Kebudayaan Indonesia, 27 Oktober 2016 na salpu.

“Negara pe domma mangakui anjaha mambere apresiasi hubani sipanganon “dayok nabinatur” sebagai daya ciptani leluhur orang Simalungun, samintolah ma hita Simalungun on. Maningon mambotoh ma homa hita patupahon dayok nabinatur on, “nini marga Purba, par jemaat GKPS Bandung, 5/9/2021.

Boras, Uttei Manis Simalungun, pakon na Legan

Panitia Pesta Olob-olob GKPS Resort Bandung 2021 mambahen aksi solidaritas kepedulian hubani warga GKPS Bandung na terdampak Covid-19. Piga-piga siluah na iboban panitia hu pagorini kuria aima boras, uttei manis Simalungun, pakon nalegan.

Siluah ai ibere panitia do hubani warga GKPS Resort Bandung na mabalu, na lanjut usia, pakon na terpuruk ekonomi keluargani, anjaha ibahen do siluah penghargaan hubani tenaga kesehatan garda terdepan pelayanan pasien covid-19.

Panitia marpandapot, bani halak Simalungun, boras sabotulni lang pitah sekedar bahan makanan atappe urusan dapur. Buei do makna pakon nilai na tersirat bani boras. Bani kebiasaan adatni halak Simalungun, gati do ni bogei umpasa adat hubunganni boras pakon sahap horas. Contohni, “Boras sabur-saburan, ibabou ni pinggan pasu, horas hita ganupan, sai jumpahan pasu-pasu,”; Boras sansupak ma boras sannangging, horas ma nasiam mulak horas homa hanami natading.”; “Boras ni par Purbatua, iboan hu Tiga Balata, horas ma hita sayur matua, itumpak-tumpak Naibatanta.” Boras aima simbol pasu-pasu kesejahteraan sosial hubani halak Simalungun.

Uttei manis hun Simalungun on itandai janah igoran do Jeruk Medan. Wilayah Kabupaten Simalungun khususni Kecamatan Raya das hu Simalungun Atas, aima salah satu sentra jeruk Sumatera Utara selain Berastagi Kabupaten Karo, pakon Kabupaten Dairi.

Sondahan on, jeruk Medan iporluhon sebagai sumber Vitamin C na manambah imun (kekebalan) angkula ni jolma humbani virus covid-19. Keunggulanni uttei Simalungun aima morum anjaha manis-manis (lang migar apalagi masapot). Ambahni ai, ibanding jeruk “lux” na legan, Jeruk Medan pe na si urahan hargani marimbang uttei na legan nari ipasar buah.

Paket Diakonia & Apresiasi Olob-Olob GKPS Resort Bandung 2021 iperkirahon marjumlah 80-an paket na isebarhon melalui pengurus Seksi Bapa jemaatni bei. Harapanni, haganup na manjalo paket ai, itonggohon panitia pakon jemaat GKPS Resort Bandung ase tambah ma pasu-pasu janah totap sehat ganupan bani na mandompakhon pandemi Covid-19 sonari on.(Penulis Desmanjon Purba, S.S. -Sekretaris Seksi Bapa GKPS Bandung, Seksi Diakonia & Apresiasi bani Panitia Pesta Olob-olob GKPS Bandung Resort Bandung 2021)

Sekjen GKPS Pdt Dr. Paul Ulrich Munthe dan Inang Foto Bersama pakon Kel St DR Bonarsius Saragih Manihuruk SH MH/ Br Simanjuntak Pakon Niombah, Parumaen bani Pesta Olob-olob GKPS Bandung 2021, Minggu 5 September 2021 .(Foto: FB Bonarsius Saragih)